Connect with us
[video width="360" height="360" mp4="https://dokinkarfe.com/wp-content/uploads/2023/07/WhatsApp-Video-2023-07-13-at-2.27.06-PM.mp4"][/video]

Labarai

Masu Dandatsar Intanet Sun Kutsa Kai Ma’adanar Bayanan Ƴan Sanda, A Burtaniya

Published

on

Rundunar ƴan sandan Manchester, da ke zama guda daga cikin manyan tawagogin ƴan sandan Burtaniya, ta gamu da sharrin masu kutsen intanet, inda su ka shige cikin rumbun adana bayanan hukumar, tare da sace bayanan katinan Jami’an rundunar fiye da dubu guda.

Jami’an rundunar ƴan sandan ta GMP, sun bayyanawa manema labarai cewar, an sanar da su batun kutsa kai cikin bayanan nasu tun a jiya.

Jaridar Dailymail dai ta rawaito cewar, mafi yawan masu sharhi kan al’amuran tsaro sun yi amannar cewar, masu kutsen na shirin yin amfani da bayanan ne wajen samar da ƙananan motoci, irin na Jami’an ƴan sanda.

Da ya ke jawabi, Mataimakin Babban Kwastabul, Colin McFarlane ya ce, “Muna da masaniyar hare-haren na’urar da su ka shafi, hukumomin Burtaniya da dama, ciki kuwa har da GMP, inda aka kwashi bayanan Jami’an da ke Aiki da hukumar. A wannan matakin, ba mu da masaniyar ko a bayanan da su ka kwasa har da na kuɗi.

“Mun kuma ɗauki wannan batu da muhimmanci, inda mu ka shigar da shi sashen binciken manyan laifuka.

“Mun tuntuɓi Ofishin Kwamishinan yaɗa labarai, kuma muna yin dukkannin mai yiwuwa wajen ganin an sanar da ma’aikata halin da ake ciki, an kuma amsa musu tambayoyinsu, dan su ji an damu da su,” McFarlane ɗin ya ƙara da bayyanawa.

Wannan kutse kuma, ya zo ne kwanaki kaɗan bayan da aka kusa kutsa kai cikin shafin rundunar ƴan sandan babban birnin ƙasar, a watan da ya gabata.

Click to comment

Leave a Reply

Your email address will not be published. Required fields are marked *

Labarai

Yan Bindiga Sun Dawo Hanyar Kaduna Zuwa Abuja, Sun Sace Mutum 30

Published

on

Wasu ‘yan bindiga a ranar Lahadi sun kai hari kan matafiya a kan hanyar Abuja zuwa Kaduna tare da yin garkuwa da mutane sama da 30, kamar yadda shaidu da shugabannin al’umma suka shaida wa Daily Trust jiya.

An yi garkuwa da mutanen ne a Dogon-Fili kusa da Katari, kan hanyar Kaduna zuwa Abuja a karamar hukumar Kachia ta jihar Kaduna.

Wannan dai shi ne karon farko cikin sama da watanni goma da ake tafka ta’asa ga jami’an tsaro a kan hanyar Abuja zuwa Kaduna.

Binciken da jarida ta yi ya nuna cewa lamarin ya faru na karshe a kan hanyar a ranar 1 ga Maris, 2023 inda aka yi garkuwa da mutane 23.

Wani tsohon dan majalisa, Sanata Shehu Sani ya tabbatar da harin a shafinsa na X, inda ya bayyana cewa wasu abokansa biyu ne suka tsira da kyar daga hannun barayin da suka yi garkuwa da su.

Ya kuma ce ‘yan bindigar sun tare hanyar ne tare da gudanar da aiki na wani lokaci duk da cewa akwai jami’an tsaro da yawa a hanyar fiye da yadda take a da.

Sani ya ce wasu abokansa biyu daga jam’iyyun adawa da masu mulki da ke dawowa Abuja daga Kaduna da kyar suka tsere yayin harin da ‘yan bindigar suka kai musu.

Sani ya ce: “A daidai lokacin da muka samu kwanciyar hankali, a daren jiya (Lahadi) masu garkuwa da mutane sun koma hanyar Kaduna zuwa Abuja. Sun tare hanya sun yi awon gaba da mutane da dama da misalin karfe tara na dare a kusa da kauyen Katari. Biyu daga cikin abokaina masu girma daga duka jam’iyyun da ke mulki da na ‘yan adawa, sai da suka shiga daji kamar Usain Bolt. Amma duk da wannan lamarin, akwai jami’an tsaro masu yawa a kan hanyar fiye da yadda suke a baya.”

Wani mazaunin Katari mai suna Suleiman Dan Baba ya ce lamarin ya faru ne da misalin karfe 9:33 na dare inda ‘yan bindigar dauke da bindigogi kirar AK-47 suka fito daga cikin daji suka tare hanyoyin biyu, inda ya ce sun shafe kusan mintuna 45 suna gudanar da aikin.

Ya kuma bayyana cewa ‘yan bindigar sun bude wuta tare da fasa tayoyin wasu motoci, lamarin da ya ce ya tilastawa direbobin da suka hada da motocin kasuwanci tsayawa.

“’Yan bindigar sun tilasta wa matafiya sauka daga motocinsu, kafin su shige cikin daji,” in ji majiyar.

Wani mazaunin Jere, Samaila Shehu, ya ce lamarin ya faru ne a nisan kilomita daya da Jere, kuma an yi awon gaba da matafiya sama da 30 a wurin.

Dailytrust ta ce ta gano cewa ‘yan bindigar wadanda suka raba kan su gida biyu sun kuma kai farmaki a kauyukan Bishini da Kokore da ke kan hanyar Abuja zuwa Kaduna, inda suka kuma yi awon gaba da wasu mutanen kauyen da ba a tantance adadinsu ba.

Shu’aibu Adamu Jere, shugaban al’ummar yankin, shi ma ya tabbatar da faruwar lamarin, inda ya bayyana cewa dan uwansa ya tsere daga harin da aka kai a kusa da Dogon Fili, kusa da garin Katari a ranar Lahadin da ta gabata. Ya ce an jikkata wani direba, sannan an gano motoci biyu, Sharon da wata karamar mota a bakin hanya babu kowa a bakin hanya bayan faruwar lamarin.

“Eh, lamarin ya faru ne da misalin karfe 9:30 na dare, kuma aikin ya dauki kimanin mintuna 45 a kusa da Dogon Fili kusa da Katari a ranar Lahadi. An harbi direban daya daga cikin motocin kuma aka bar shi a wurin. Daya daga cikin dangina ya tsira daga harin,” inji shi.

Sai dai ya kasa bayyana adadin mutanen da aka sace yayin da aka kai harin da daddare, amma ya ce an garzaya da direban da ya jikkata zuwa wani asibiti da ba a bayyana ba domin yi masa magani.

Shima wani mazaunin Katari, Lauyan da ya so a sakaya sunansa, ya tabbatar da cewa an tare hanyar ne a daren Lahadi a lokacin da yake shirin komawa Kaduna.

A cewarsa, sojojin da ke da nisan mil 500 daga Katari sun fatattaki ‘yan bindigar.

“An gaya mini cewa ‘yan bindigar sun tare hanya a daren kafin sojoji a Katari su fatattake su. Amma ban sani ba ko an sace mutane,” inji shi.

Da aka tuntubi kwamishinan tsaro na cikin gida da harkokin cikin gida na jihar Kaduna, Samuel Aruwan jiya, ya ce ba zai iya tabbatar da faruwar lamarin ba, amma ya yi alkawarin komawa ga wakilinmu bayan wani taro da ya halarta.

Jami’in hulda da jama’a na rundunar ‘yan sandan jihar, ASP Mansir Hassan, da aka tuntube shi, ya ce zai bincika ya gano abin da ya faru.

Continue Reading

ZAFAFA

Copyright © 2013 - 2023 By Dokin Ƙarfe Consultancy Services Nig. Ltd.